НИМТӘН иск. (Будагов II: 299) «половинник (мифическое существо, имеющее только одну ногу, одну руку, один глаз)», чаг. Ниснас, Шүрәле, Ярымтык. Азиядә киң таралган бу образ бор. гадәт буенча, кешенең бер аягын, бер кулын сындырып, бер күзен чыгарып җәзалау яисә корбан итүнең чагылышы булып тора. Реальлектә имгәтелгән һәм кырга чыгарып ташланган нимтәннәрнең исән калу ихтималы бик аз булган. Төркиләрнең килеп чыгышы тур. легендаларның берсендә бер нимтән малайның ана бүрегә өйләнүе, шуннан төрки кавем үрчүе тур. сөйләнелә һ.б. К. Ниснас.