ЗАР «стенания; сетование» > удм., мар. диал. зар id. (ш. ук фразеологизмнарда: удм. зар бордыны – зар елау) < фар. зāр < авест. zār, āzār «зар, мөшкеллек; инәлү; зәгыйфь, нечкә» (к. Азар ). Зар сүзе төрки телләргә күптән кергән һәм фигыльләшеп тә беткән булган: зәрык-у (зарыгу) фигыле бор. *зар- фигыленең интенсивлык формасы. К. ш. ук гом. кыпч. зарла-у, зарлан-у, зарлы.

Зар-зар һәм зари (зари-зари) дериватлары фар. теленең үзендә дә бар. Зарила-у (зарилап елау, сорау) тат. телендә ясалган.

Гар. зāрū’ «зари» < фар.