БАЛТЫР «икра ног» < гом. төрки балтыр, балдыр «балтыр, аяк; кыяклы үсемлек сабагы, балдак; билдәмә» < *бағал-тур, бағал-тыр (-тур, -тыр морфемасының чыгышы ачык түгел) «билдәмәле сабак» сүзеннән, бағал (к. Бәкәл ) нигезеннән, к. тат. диал. (ЗДС: 94) бағылтырық «завязка, перевязка», чыгт. балдур «беләзек; сум акча» (Радлов IV: 1505), baldırın «балтыр» (Поппе 1938: 202). Бор. төрки baldır «чыгынты тау, кашлак» сүзеннән балтырга мәгънәви мөнәсәбәте ачык түгел: ихтимал, монда контаминацион тәэсирләр бардыр, к. як. балчарган ~ бур. балсагар (< балчагар) «кабарынкы мускул». К. Балдак. ЭСТЯ II: 54–55.

Балтыр сүзеннән: тат. диал. балтырак ~ төр. baldırak «балак» һәм тат. диал. балтыра-у «чалбар балагы итек өстеннән йөрү» (гадәттә балак итек эчендә була).