ЯЛГЫШЛЫК и. 1) Ялгыш хәл, хата. Мәликә апаның безгә – Кәүсәрия энеләренә каныгуын, бәлки, шул ялгышлык аңлата торгандыр? В.Юныс. Галәмдә ниндидер ялгышлык: бу соңга калган көзге яшен күпләрне хафага салды. Д.Каюмова

2) Ялгышу очрагы. Кызмыйча гына уйлап кара: берәр җирдә хаксызлык, ялгышлык эшләп ташламадыңмы? А.Гыйләҗев. Киресенчә, алар синең ялгышлык җибәрүеңне көтеп йөриләр. В.Нуруллин

◊ Ялгышлык белән 1) Ялгышып, хаталанып. Мафия кешеләре аны ялгышлык белән урлаган. Кем беләндер бутаганнар. А.Хәсәнов. Исмәгыйльне ялгышлык белән зинданга салган булганнар, гаепле кешене тотканнар, диярбез. Ф.Яхин; 2) Уйламыйча, очраклы рәвештә; начар уй, усаллык белән түгел. Тикшергәндә, ялгышлык белән, француз телен әз-мәз беләм, дип ычкындырганмын... Д.Салихов. Ялгышлык белән, ачудан гына әйтелгән сүз булса да, Расих, үзе уенча, ирлеген итте: шул кичтә үк, чемоданнарын төяп, иптәшләре янына тулай торакка күченде. Р.Рахман