ЮТӘЛЛӘ’Ү ф. Туктаусыз йөткерү; ютәл белән авыру. [Әтисе] Ютәлләп уяна да, мич алдына чүгәләп, шул тәмәкесен гөжләтеп утыра. З.Мурсиев

Ютәлләп алу Аз гына, кыска вакытлы ютәлләү. Кинәт Фәһимә [җырлаганда] төртелеп калды, ютәлләп алды һәм алдагы ике юлны тирән күкрәк тавышы белән дәвам итте. Д.Каюмова

Ютәлләп җибәрү Кинәт ютәлли башлау. Сәламәтлеген тикшергән чакта, Галимҗан тагын да нык ютәлләп җибәргән. С.Поварисов

Ютәлләп кую Кинәт, бер тапкыр ютәлләү. Ара-тирә буылып ютәлләп куюы гына бу малайның тәнендә яшәү гаме барлыгы хакында әйтеп тора. Г.Гыйльманов

Ютәлләп тору Гел, һәрвакыт ютәлләү; берара ютәлләү; әле, сөйләү моментында ютәлләү. Читкә борылып, беркавым ютәлләп торды. М.Хәсәнов. Юк болай, карчык кына ютәлләп тора, – дип мыгырданган [Йосыф абзый]. Р.Зәйдулла

Ютәлләп чыгу Билгеле бер вакыт арасының башыннан ахырына кадәр ютәлләү. Ул төне буе корык-корык ютәлләп чыга, йоклый алмый. Р.Батулла

Ютәлли башлау Ютәлләргә тотыну. Ул, ютәлли башлап, тиз генә кесәсеннән кулъяулык чыгарып, авызын томалады. М.Хәсәнов