ШӘҺАДӘТ и. гар. 1) иск. Шаһитлык, гуаһлык, таныклау эше. Син ни белдең? Кемгә мәкъбүл шәһадәтең? Г.Тукай

2) Мөселман булуның беренче шарты булган «Әшһәдү әл-лә илаһә иллаллаһ вә әшһәдү әннә Мөхәммәдән габдүһү вә рәсүлүһ» (Аллаһтан башка илаһ юк, Мөхәммәд – аның колы һәм илчесе) җөмләсен әйтеп иман китерү гамәле. Нури бабай да биш вакыт намазын, шуның дәрәҗәсендә үк үзенә бурыч итеп белгән зикерләрен, вирдләрен калдырмау гына түгел, --- тәүбәсен, шәһадәтен яңарта тора. Г.Ибраһимов. Мотыйгулла ахун хәзрәт белән Мирхәйдәр мулла кыз ишерелгән йортка барып, Анастасияне кире Җанбикәчкә кайтарып, тәүбә иттереп, шәһадәт догасын вә башка сүрәләр укытып, исламга дүндереп кайттылар. Р.Батулла

◊ Шәһадәт бирү 1) Гуаһ булу, шаһит булу, раслау. Атасы Җәләл хәзрәтнең шүрлегендә өелеп яткан китаплар да аның раслыгына шәһадәт бирәләр. Г.Ибраһимов; 2) к. шәһадәт китерү ( 1 мәгъ.). Аллаһның ризалыгына ирештерәчәк икесе: Аллаһтан башка тәңре юк дип шәһадәт бирүегез һәм гөнаһларыгызны ярлыкавын соравыгыз. Кызыл таң. Шәһадәт китерү 1) «Әшһәдү әл-лә илаһә иллаллаһ вә әшһәдү әннә Мөхәммәдән габдүһү вә рәсүлүһ» (Аллаһтан башка илаһ юк, Мөхәммәд – аның колы һәм илчесе) җөмләсен тавыш белән уку. Аллаһның берлегенә шәһадәт китерү; 2) Ислам динен кабул итү. Шулчагында Аллаһы пәйгамбәргә ярдәмгә Җәбраил фәрештәне иңдерә. Моны күргәч, кяферләр шәһадәт китерәләр, ун мең яһүд мөселманлыкка чыга. А.Тимергалин