ҮКЕРТЕП рәв. 1) Бик шәп итеп; нык итеп; бик тырышып; бөтен шартларын туры китереп. Молодец, энем, үкертеп сату итә башладың. Т.Гыйззәт. Башка укучылар да Акназардан гел зарландылар: әле анысын, әле монысын үкертеп кыйнаган. Г.Әпсәләмов. Берзаман торып караса, Мөдәррис тә, Гәрәй дә үз ихаталарында үкертеп эшләп яталар. М.Галиев

2) Күп итеп, мул. Ачлык елдан соңгы елны исеңә төшер: бөтенләй чәчмәгән җирләрдә дә үкертеп уңыш урдылар. Т.Гыйззәт

3) Бик каты, көчле итеп. Гарифтан үкертеп самогон исе килә. И.Шиһапов

4) Аяусыз, рәхимсез рәвештә. Дошманны үкертеп куар көннәр килеп җитте. Г.Әпсәләмов