ТӨНЛӘ рәв. Төнге вакытта, төнне. Шәһәр малаеның уч төпләре кабарып чыкты, суелган җирләре төнлә ачыттырып-ачыттырып сызлады. А.Тимергалин. Күрәсез бит, мунчадан соң Рамил бөтенләй эреп бетеп йоклый, төнлә ник бер уянып карасын... А.Әхмәтгалиева

◊ Төнлә туган 1) Караңгы чырайлы, башкалар белән рәтләп сөйләшми торган кеше турында. Дөнья турында, кызлар турында аның белән бер сүз алышып булмый иде: әллә нинди төнлә туган нәмәрсә! А.Гыйләҗев; 2) Акылсыз, юләр яки аңгыра кеше турында. Күп тә үтмәде, бер олырак яшьтәге апа килеп чыкты да: – Төнлә туган, ник куасың ул сарыкларны? – дип, мине әрли башлады. Н.Гариф. Дурак, аңгырабаш, төнлә туган. Ф.Яруллин; 3) Кеше күрмәгәндә, качып-посып ясалган (көмешкә, исерткеч эчемлек). Шуның өстенә, һәркемдә – төнлә туган. Хуҗалык һаман да чөгендер үстергәч ни, писугын капчыклап бирә, --- бал кой да, көмешкә чыгарып эч, артыгын сат. Р.Рысаев. Шуңа күрә самогонны «төнлә туган» дип йөртәләр икән, белдем инде хәзер. Туган як