ТИ’МӘГӘН с. 1) Нинди дә булса кораллар турында сүз барганда: шул кораллар белән эшкәртелмәгән булуны аңлата. Мондый вакытларда кул һәм пычкы тимәгән кара урман буйлап баруы аеруча рәхәт, һава саф, җиңел, әллә нинди хуш исләр аңкый. Г.Әпсәләмов. --- кап-кара сакал-мыегына күптән пәке тимәгән, сәләмә генә киемле, чандыр гына гәүдәле бер кеше тегеңә якынрак килде дә куркып кына: – Мин ием дисәтник, Гата туган, – диде. В.Нуруллин

2) Гомумән файдаланылмаган, эшкәртелмәгән. Күптән инде түбәсе убылып төшкән, өстенә алабута, әрем үскән балчык-тирес хәрабәләргә басып, кайсы гына якка күз салсаң да, беркайчан да адәм кулы тимәгән карт дала сузылып ята. Н.Фәттах. Коридорда торган, күптән кул тимәгән көзгене ялт иттерде. Ф.Яруллин