ТӘФСИЛЛӘ’Ү ф. Тулысынча, җентекләп, бәйнә-бәйнә аңлату. Ул елларда күргән-кичергәннәрен тәфсилли китсәң, кәгазь җитмәс. К.Тимбикова. – Минем яңа тарханнарым өчен нинди ташламалар каралган, аларын да тәфсиллә, – дип, Мөхәммәдәмин янә яраларына тоз сипте. М.Әмирханов

Тәфсилләп бирү Кем өчендер тәфсилләү. Борынгы бабаларыбызның мирасын хәзерге татар теленә шагыйрь Әхмәт Гадел тәфсилләп бирә. М.Хәбибуллин. – Горизонттан югалып тор, җир тишегенә кер, яфрак астына сыен, – дип, полковник иренмичә аңлатып, тәфсилләп бирә. Т.Галиуллин

Тәфсилләп тору Озак тәфсилләү; сөйләү моментында тәфсилләү. Милләтпәрвәрләребез мине аңлар, шуңа күрә шәхси шатлык-куанычларыбызны тәфсилләп торуны кирәксенмим. А.Тимергалин. Ул көнне тагын ниләр сөйләшүебезне тәфсилләп торуның кирәге юктыр, туган. В.Нуруллин

Тәфсилли башлау Тәфсилләргә тотыну. Аның тормыш юлын тәфсилли башласаң, китап язарлык. Зәй офыклары