ТАЛЧЫБЫК и. 1) Озын, сыгылмалы, шома тал чыбыгы. Байназарның кулында быелгы талчыбык иде, шуның яфракларын өзә. М.Хуҗин. Тормыш ул – талчыбыктан үрелгән каз оясы. Н.Гыйматдинова

2) бот. Талчалар семьялыгыннан комсыл туфракларда яхшы үсә торган куак; русчасы: шелюга. Талчыбыклар, шыбыр-шыбыр килеп, Бу матурга сәлам бирделәр. М.Җәлил. Нинди ямьле Килә сыерчыклар, Бөреләнгән нечкә талчыбык. Ә.Ерикәй

◊ Талчыбык кебек Зифа гәүдә турында. Әминә талчыбык кебек нечкә, зифа буйлы. Г.Әпсәләмов. Кыз үтә дә чибәр, сөйкемле, талчыбык кебек зифа буйлы, нечкә билле иде. З.Зәйнуллин