СЧЁТ и. рус 1) фин. Товар яки башкарылган эш, күрсәтелгән хезмәт өчен акча түләү документы, түләнәсе сумманы күрсәткән рәсми кәгазь, язу. [Фазылҗан абзый:] Тик менә промкомбинаттан счёт яздырып алырга гына өлгерә алмадым. Р.Төхфәтуллин. Анда доверенностьлар, счётлар белән инде Нәркис көтеп тора иде. М.Мәһдиев

2) Банк, кредит оешмасы һ.б.ш.лар аша финанс операцияләре үткәрү хокукы; шул хокукны раслый торган документ. Кичә чит илдәге счётларны ябуның соңгы көне иде. Шәһри Казан

3) Исәп-хисап эшләрендә куллану өчен, дүртпочмаклы кысага рәт-рәт шуып йөри торган түгәрәк төймәләр тезелгән әсбаб; чут. Колхоз канцеляриясендәге хисапчыларның счёт төймәләре, колхозчыларның хезмәт көннәрен санап, өзлексез шалт-шолт килеп торды. М.Әмир. [Хуҗаның бите] Симезлеге тәмле ашавыннан булса, кызарып-кучкылланып торуы, конторда счёт төймәсе тартып кына ятмыйча, вакыты килеп җитүгә, чалгысын күтәреп, әрәмәгә яки басуга чыгуыннандыр, мөгаен. Ш.Рәкыйпов

◊ Счёт салу к. чут салу. Ишектән кергәч тә уң яктагы өстәлдә счёт салып утыручы яшь кеше алдына килеп басты Батыр. Счёт салучының бераз бушаганрак минутын көтеп, эндәшми торды. М.Әмир