САЛДЫРУ II ф. йөкл. юн. к. салуII (1 мәгъ.) // Кемнең дә булса өс яки аяк киемнәрен, башка әйберләрен чишендереп, ычкындырып яки бүтәнчә алу. Кичә Казанда ундүрт фатир талаганнар, утыз ике бүрек салдырганнар, өч кешене үтергәннәр, ике кызны көчләгәннәр. Р.Зәйдулла // Хайванның йөгән, тышау, камыт кебек нәрсәсен ычкындыру, чишү, кире алу. Серен белмәгән атның авызлыгын салдырма. Мәкаль. Хәлфә кыска буйлы иде, аңар Солтан алдында, озын торыклы байталның камыт-ыңгырчагын салдыру өчен, атны тарантас янына китерергә туры килде. Г.Ахунов. Күк айгырның да хәлен аңлап булса кирәк, бер көнне ул аны ишегалды белән янәшә бакчага йөгәнен салдырып кертеп җибәрде. Ә.Еники