ОСТАРУ ф. 1) Эшне оста эшләргә, башкарырга өйрәнү. Язмыш, инде остардым мин синнән, Шатлыкларым үзем таба беләм. Э.Нигъмәтҗан. Остарасы да остарасы әле аңа. Б.Камалов. Кышлактагы уен-җыеннарда чичәннәрдән тегесен-бусын ишетеп остара торган яшьтә ул кырыс Кызылком чүлен аркылыга-буйга гизә башлады. Т.Әйди

2) ирон. Үз-үзен белдекле тоту. Машаның кире җавап бирәсен чамалагач, остарырга була иде инде. Б.Камалов. Остардык, һай: соң җелеген җирнең Агу өреп кудырабыз өскә. Ә.Баян

Остара бару Торган саен күбрәк остару. [Фәнияр] образлар белән эш итүдә остара бара. Ф.Яруллин. Борауны борам, борам, Борам – остара барам! Боравымны кулдан алып, Колакны борды бабам... Ш.Галиев

Остара башлау Остару билгеләре сизелү

Остарып бетү Тәмам остару, белгеч булып китү. Остарып беткәч, каенанасы: «Балага зыян килмәсме?» – дип туктатмакчы булган иде дә, кая ул! Р.Мулланурова. Ләйлә: Төлкеләр, койрык болгарга остарып беткәннәр. К.Ситдиков

Остарып җитү Бик оста булып җитешү, осталыкның югары дәрәҗәсенә ия булу. --- Мөгаен, хатын-кыз заты кырык яшьтә генә шулай остарып җитәдер. Н.Гыйматдинова. Гармун уйныйм, гармун уйныйм, Һаман гармун уйныйм мин: Остарып җиткәч, барысын да Биетергә уйлыйм мин. Ш.Галиев. --- Хөснуллин да тәмам сүзгә остарып җиткән иде, кайбер профессиональ композиторлар кебек авыз эчендә ботка пешермәде ---. Х.Ибраһим

Остарып китү Соңгы вакытларда остару. Язарга ярата икән бит, тырыша торгач, тагын да остарып китәр иде әле. М.Маликова. Соңгы елларда профсоюз спорт ярышлары уздырырга бик остарып китте. Татарстан яшьләре