МАТӘМ и. кит. Кеше үлү яки берәр иҗтимагый фаҗига булу сәбәпле кичерелә торган, гадәттә төрле гомуми кабул ителгән билгеләрдә – махсус киемдә, бәйрәм-күңел ачу чараларыннан баш тартуда һ.б.ш. чагылган зур кайгы, хәсрәт. Ул бәләнд җан безне кыйлды Мәңгегә мәхрүм, ятим. Зур матәм, бик зур матәм! Зур – Милләтнең хәсрәте! С.Сүнчәләй. Безнең тормышлар шавында, Безнең богаулар тавышы ул, Безнең матәмнәр маршы ул. Х.Туфан. Илдә бер атналык матәм көннәре игълан ителә. Ә.Еники

◊ Матәм тоту Берәр фаҗига булу сәбәпле, тирән кайгы кичерү, траур саклау, уен-көлке, күңел ачулардан тыелып тору. Поляк милләте --- зур бер матәм тотарга мәҗбүр булды: Польшаның иң шөһрәтле вә гаять зур мәхәббәт казанган мөхәррире Генрих Сенкевич вафат булды. Ф.Әмирхан. Мин үзем дә матәм тотып йөрим, Мин үзем дә – йөрәге ятим. Х.Туфан