МАТАВЫКЛАНУ ф. диал. 1) Шушы моментта бер эш белән шөгыльләнү, шуның белән мәшгуль булу. Мин аның турында [З.Насыйбуллин] күптәннән язарга тиеш идем инде. Дөнья мәшәкатьләре белән матавыкланып, ничектер кул җитмәгән. Ә.Рәшит. Әле, шөкер, кабинет – ындыр табагыдай, ара – хәтсез, синең ни белән матавыкланганыңны бинокльсез абайларлык түгел. Р.Зарипов. – --- кәгазь-каләмең җитәрлекме соң? – Матавыкланма, бәк, олуг кенәз Василий Иванович Мәскәүдән бер олау язу-сызу әсбаплары җибәргән. М.Әмирханов

2) Маташу, азаплану, тырышу. Ниһаять, без кышкы суыкта көне буе авызыбызга бер бөртек ризык капмыйча матавыклангач, кичкырын мәрхүмне кечкенә автобуста Киров районының 1 нче мәктәбе янындагы зиратка җирләргә алып бардык. Г.Тавлин. Кодагый ут кабыза алмыйча матавыкланды. М.Мәһдиев. Коридорда шәльяулык япкан әбиләрнең күренеп китүендә ниндидер зур эш белән матавыклану, кабалану, ашыкканлык сизелә. Р.Низамиев