КЫЧЫТКАН и. Кычытканчалар семьялыгыннан, сабагында һәм яфракларында тәнне чага торган төкләре булган, яфраклары витаминга бай бер яки күпьеллык үләнчел үсемлек. Әле киртә буйларында ашка салырлык кычыткан өлгермәгән иде… М.Мәһдиев. Ярыша-ярыша, кузгалак, кычыткан, кыр какысы җыярга тотындылар. Р.Мулланурова. Ул да шунда гына иде: мунча баскычына утырган да каз, үрдәк бәпкәләренә дип, тәпке белән әрекмән яфраклары, кычыткан чабып тураклый. Ә.Гаффар

◊ Кычыткан себеркесе белән чабу Җиңелчә җәза бирү. Кычыткан тел Бик усал телле, зәһәр кеше. Каһәр суккан кызлар кычыткан телле булалар бит. И.Салахов