КАЛҖАЮ ф. Төзлеген, турылыгын, тигезлеген югалту, бер якка бөгелү, кәкрәю. --- арзанлы буяу белән кат-кат сыланган ишеге калҗаеп, салынып төшкән мунча тыштан караганда бер дә кешене җәлеп итәрлек түгел. Ф.Латыйпов

Калҗаеп бетү Тәмам калҗаю. --- [ул] су кырыенда, җиргә иңеп, бүрәнәләре калҗаеп беткән һәм шул калҗайган бүрәнәләрне берничә җирдән терәтеп, кызыл балчык белән сыланган, шалаш шикелле кечкенә бер өйдә тора. М.Гафури

Калҗаеп калу Ниндидер сәбәптән калҗайган хәлгә килү. --- нәкышләп, бизәкләп ясалган такталарның буяулары кояш-яңгырдан уңган, аннан да, моннан да калҗаеп калган. Н.Хәсәнов

Калҗаеп килү Күзгә күренеп калҗайган торыш ала бару

Калҗаеп тору Калҗайган булып күренү; калҗайган хәлдә булу. Безнең офицерларның погоннары да иләмсез, коргаксыган чабата олтырагы сымак калҗаеп тора ---. М.Галиев

Калҗая бару Торган саен ныграк калҗаю, акрынлап, аз-азлап калҗаю

Калҗая башлау Калҗаерга тотыну

Калҗая төшү Бераз калҗаю; тагын да ныграк калҗаю