ИЛТИФАТ и. гар. 1) Игътибарлылык, ягымлылык, ихтирамлылык. Дасаев, --- бу сәер юлдашлары аның һәр хәрәкәтен хәтерләрендә калдырырга тырышып, үзенә сокланып карап торганнарын күрә иде. Мондый илтифатны ул әле беркайчан да тоймаган иде. Р.Мирхәйдәров. – Илтифатыгыз өчен рәхмәт, дәвам итсәгез, хәерлерәк булыр, – дисә дә, Комзинаның күңелен һаман кибет хәлләре кытыклап тора иде. М.Насыйбуллин

2) Кадер-хөрмәт, зурлау, олылау. Кызның миңа кылган илтифатына көнлиләр... М.Гафури. Кабык өстенә корама юрган, корама юрган өстенә мәетне аягы белән ишеккә таба каратып салды һәм, җил-буран керерлек урын калдырмыйча, илтифат белән төрде... А.Хәлим. Популярлашып киткәч, эшләр җайлана төшкәндер: кая гына барсаң да таныйлар, сиңа хөрмәт, илтифат күрсәтәләр... Юлдаш

◊ Илтифатка алу Игътибар итү, исәпкә алу, кирәкле, зарури дип санау. Мин сөйләгәндә сызгырсалар да, һич илтифатка алмадым. Ш.Мөхәммәдев. Илтифат ясау Хөрмәтләү, олылау, зурлау. [Көтүче] Кунакка илтифат ясады. Г.Ибраһимов