ЕРАКТА рәв. 1) Ерак урында, ерак җирдә; әллә кайда. Ул инде хәзер һәлакәт булган җирдән еракта, Гарәбә диңгез янындагы оҗмах бакчасында сәламәтлеген ныгыта. Г.Үзиле. Ул синнән гел читтә, ул синнән еракта, ләкин һаман да синең йөрәктә. Г.Ахунов // кбт. форм. Бик еракта. --- килеп җиткәнче үк, алар күрде: агачлык янында бер-ике дөя тора, еракта-еракта тагын берничә кучкыл күзгә чалына. Р.Батулла. Кайдадыр, еракта-еракта, эт өрә. Ф.Гыйльми

2) күч. Үткәндә; борынгылыкта, тарихта. Картның тавышы карлыкты, әллә кайчангы, еракта, бик еракта калган үткәннәрне уйлап булса кирәк, карашын тәрәзәдән күренеп торган урманнарга төбәп уйга калды. Ф.Латыйфи. Бәйрәмнең тамырлары бик еракта – ыруглык мөнәсәбәтләренә барып тоташа. Казан утлары

3) күч. Читтә, икенче юнәлештә. Аның уйлары хәзер кайдадыр читтә, еракта, чабышып йөрде. Н.Фәттах

◊ Еракта йөрү Нәрсә дә булса якынлашмау, урап үтү, аңа ия була алмау. Килдеме соң аңа үзе көткән бәхет? Нигә ул әйләнеп узды, аңардан читтә, еракта йөрде? Н.Хәсәнов