ДОГАЛЫК и. 1) Дога тексты. Догалыклар укый-укый, әллә кемнәр әткәемә ап-ак күлмәк кидерәләр. Һ.Такташ. Хәзрәт, килеп, Галиәкбәр агайның баш очына утырып, авыз эченнән бер-ике догалык укыды. Ш.Маннур

2) Догалар язылган кәгазь (китап һ.б.ш.); догалар җыентыгы. Мәчет сурәте төшкән кара пыялалы догалыклар да почмак якка күчкән иде. Мөштәри догалыкларны алып, акча биреп чыгып киткәннән соң, китапчы мыек астыннан гына көлеп калды... Ш.Мөхәммәдев