ГӨРӘНКӘ и. рус иск. Фунт, бер кадакка тигез булган (405 гр.) авырлык үлчәү берәмлеге. Бүген тоз алган кешеләр, тоз хакын оныта күрмәгез. Ике гөрәнкә тоз – бер пот арыш. Ю.Әминов. Кызым, алай да һай каты кеше Әхмәт бай, ике ишек төзәткәнгә барысы кырык биш тиен бирде; ярты гөрәнкә вак кадак та үзем алдым әле, барсына – кырык биш тиен. Ф.Халиди. Бер каз, бер кадак май, бер гөрәнкә язгы йон алып килгәнен белгәч, күрәзәче агай, батырның анасына карап, авызын ерды. Р.Батулла

◊ Гөрәнкәсе җиңел Тулы түгел, акылга зәгыйфь, тинтәк