ВА’РВАРЛЫК и. 1) Мәдәнилек, белем дәрәҗәсе иң түбән баскычта булу, алгарыштан читтә калган булу

2) тар. Кешелек җәмгыятендәге мәдәният үсешенең вәхшилек һәм цивилизация арасында булган билгеле бер баскычы // махс. Борынгы җәмгыять үсешендәге аерым чорның Л.Морган тарафыннан кертелгән, искергән атамасы. АКШ галиме Льюнс Морган теориясе буенча, кешелекнең кыргыйлык стадиясеннән – варварлыкка, варварлыктан цивилизация стадиясенә күчүе шулай ук төрле формалардагы сикерешләрне гәүдәләндерә. К.Гыйззәтов

3) Аерым кешегә, халыкка, тарихи һәм мәдәни хәзинәләргә һ.б. тупас, рәхимсез мөнәсәбәт; культурасызлык. – Үгезләрне үтерүдә сез безне варварлыкта гаеплисезме? – ди бер матадор. Р.Фәйзуллин. Кайбер язучыларыбыз, шушы төзелешләргә багышланган сандык зурлыгы романнарында, варварлыкка мәдхия җырлады. М.Юныс. Мәскәүдә булып үткән вакыйгалардан соң, кайбер яшүсмерләр варварлык өчен кулга алынды. Ватаным Татарстан