БАШТА рәв. 1) Иң элек, беренче нәүбәттә, алдан. Башта сөйләгән хикәям белән моның аермасы – шул гына. Г.Тукай. Башта ук шуны әйтим: без пессимист булабыз, дөнья сүгәбез, хәятта ямь юк, кызык юк, дибез, – бар да юләрлек, бар да сукырлык икән. Г.Ибраһимов. Киндер башта соры төсле иде, инде ап-ак булды. Дәрдемәнд. Башта ферма мөдире Ибәтулла абзый көнлек савымның нәтиҗәләрен укыды. Н.Гыйматдинова

2) Элек, әүвәл, борынгы заманда. Мәмләкәтнең төрле җирендә башта хан тарафыннан аксөякләрдән куелган баскак яисә «даругай» дигән бәк торган. Г.Гобәйдуллин