БАГЛАНЫШЛЫ с. 1) Бәйләнеше булган. Ахун, халык авызында үзенә каратып сөйләнгән кайбер гайбәтләр белән багланышлы бу эшне бер якка калдырып, сүзне туйлар, никахлар, мәҗлесләр тирәсенә күчерде. Г.Ибраһимов. Курбе – Франция революциясе чорларында барбизонецлар «Париж янында Барбизон исемле авылга багланышлы» дип аталган художникларның иң алдынгыларыннан. Г.Гобәй

2) Нинди дә булса берәр нәрсәгә караган, мөнәсәбәте булган. --- әсәрдәге төп фабула үсеше белән бертөрле дә багланышлы түгелләр. Г.Нигъмәти. Имән, башын җиргә таба авыштырып, дөнья белән хушлаша, әтисенә багланышлы чор истәлекләрен үзе белән алып, ул киткән якка ава. Н.Хәсәнов