АЛҖЫТУ ф. 1) Арыту, талдыру, хәлсезләндерү. Олаучылар атларны куаламаска тырышалар, бахбайларны алҗытасылары килми. Ф.Сафин

2) Аптырату, тилмертү, йөдәтеп бетерү. Алай гына да түгел, Чабаксарда яшәгәндә, көн саен, мине «Әйдә загска» дип алҗыта иде. А.Вергазов

Алҗыта бару Торган саен ныграк алҗыту

Алҗыта башлау Алҗытканы сизелү

Алҗыта төшү Бераз алҗыту

Алҗытып бетерү Бик нык алҗыту. Күселәр [песи баласын] куа-куа алҗытып бетергәннәр. А.Алиш. – Гимназия! Ул нинди булыр икән? – дип, малай әнисен алҗытып бетерде. Җ.Тәрҗеманов

Алҗытып җибәрү Бераз, берникадәр алҗыту. Аның өстенә тыгыз һәм эссе трамвай да ялыктырып, алҗытып җибәргән иде бугай. Р.Гарипов

Алҗытып кую Кинәт алҗыту

Алҗытып тору Һәрвакыт, бертуктаусыз алҗыту. Гөлфинур сеңелкәшне тыңлыйк та аннары аны алҗытып тормабыз, кайтарып җибәрербез. А.Вергазов