АКЧАРЛАК и. зоол. Йөзүче кошлар семьялыгыннан, озын канатлы һәм озын томшыклы, ак яки соры төстәге куе йомшак мамыклы, балыклар белән туклана торган кош; су тавыгы; русчасы: чайка. Пароход өстендә, зур ак чәчәк яфракчыклары сыман, акчарлаклар өере бөтерелә. М.Галәү. Балыкчылар Арал диңгезенең климатик холкын бик әйбәт өйрәнгәннәр. Акчарлаклар ярдан еракта оча икән – димәк, көннең бу яртысында көчле җил булмаячак. Акчарлаклар яр тирәсендәрәк оча икән – шторм буласын көт тә тор. А.Муранов. Шәрәфи агайның тәҗрибәсе буенча, суның җылылыгына, акчарлакларның хәзердән үк чит буйларда очып йөрүләренә караганда, быел да балык күп булырга чамасы юк түгел. Ш.Камал